समाचार स्थानीय

दमकमा लागुऔषध नियन्त्रणमा कडाई

दमक, १९ माघ। दमक नगरपालिकाले वडा वडामा लागुऔषध नियन्त्रण, रोकथाम, सचेतना अभियान सकेपछि अब समग्र नगरलाई दुव्र्यसनमुक्त बनाउन कडाईकासाथ अघि बढ्ने सरोकारवालाले धारणा राखेका छन् ।
विहिवार दमकमा आयोजित अन्तरक्रियामा अभियानको उपलब्धी र सचेतनाबारे जानकारी गराइएको छ । प्रमुख जिल्ला अधिकारी बन्धुप्रसाद बास्तोलाको प्रमुख आतिथ्यतामा भएको कार्यक्रममा सहभागीहरुले समाजबाट लागुपदार्थ दुव्र्यशनी घटाउन सम्बन्धित परिवारको साथ चाहिने र परिवार आफै सचेत हुनुपर्ने औंल्याएका छन् । उनले नगरको यस्तो अभियान थाहा पाएपछि यसलाई थप प्रभावकारी बनाउन सहयोग गर्ने बताए । उनले भने– ‘यो अभियान एकवर्षमा मात्रै नसकिने र अभियानभरबाट आएको परिवर्तनलाई समाजमा बाँढ्दै निरन्तर अघि बढाउन सुझाव दिए ।
कार्यक्रममा नगरपालिकाका प्रमुख राम कुमार थापाले यो अभियानमा सबै नगरवासीको साथ र सहयोग आवश्यक रहेको बताए । उनले अभियानले दुव्र्यशनी घटाउन धेरै सहयोग पुगेको र वडावडासम्म सचेतना जगाउन सजिलो भएको बताए । उनले लागुऔषधका कारण समाजका सबै तहका यूवा तथा अन्य उमेर समस्हलाई समेत असर पारिरहेको र दमक जिल्लाकै सबैभन्दा दोस्रो ठूलो कारोबार हुने नगरमा रहेकोले यसलाई निर्मूल पार्न अभियानका रुपमा सुरु गरिएको जानकारी गराए ।
अभियान अवधिमा दमकबाट ३८ जना पक्राउ गरिएको र २० जना सुधार केन्द्रमा राखिएको जानकारी गराइएको छ । उनीहरुलाई सचेतना जगाउँदै उपचारको पक्षमा पनि काम अघि बढाएको छ । साथै, नगरले आगामी फागुन १ बाट विद्यालय र सरकारी संस्था परिषरमा सूर्तीजन्य पदार्थ विक्रिवितरणमा रोक लगाउने बताएको छ । कार्यक्रममा उपप्रमुख रेगिना भट्टराई प्रसाई, जिल्ला प्रहरी कार्यालय, इलाका प्रशासन कार्यालयका प्रतिनिधि लगायत सबै सरोकारवालाहरुको उपस्थिती रहेको थियो ।
नगरले दमकमा लागुऔषध दुव्र्यसनीका विरुद्ध अभियान मंसिरको अन्तिम साता भव्य कार्यक्रमबीच उद्घाटन गरेको थियो । कोशी प्रदेशका मुख्यमन्त्री केदार कार्कीको प्रमुख आतिथ्यतामा समुद्घाटन गरिएको सो अभियान यता नगरले दमकका १० वटै वडामा गएर वडास्तरको अन्तरक्रिया सम्पन्न गरिसकेको छ ।

You may also like