विनोद राई बने ‘द भ्वाइस अफ् नेपाल’को विजेता

दमक, २९ पुस। इलामको फाकफोकथुम गाउँपालिका ५, लुम्दे घर भई पछिल्लो समय मोरङको पथरी शनिश्चरेलाई कर्मथलो बनाउँदै आएका विनोद राईले ‘द भ्वाइस अफ् नेपाल सिजन ५’को उपाधि जितेका छन् ।
ललितपुरको गोदावरीस्थित सनराइज हलमा आयोजित ग्रान्ड फिनालेमा तीन फाइनलिस्ट मकरबहादुर योञ्जन, कुमार प्रयास राई र नोगेन लिम्बूलाई पछिपार्दै विनोदले उपाधि चुमेका हुन् । उनले उपाधिसँगै २० लाख रुपैयाँ पुरस्कार हात पारेका छन् । प्रतियोगितामा मकरबहादुर फस्ट रनरअप, कुमार सेकेन्ड रनरअप र नोगेन थर्ड रनरअप भए । चारकोच मध्ये कोच मिलन नेवारको समूहबाट विनोद, राजेशपायल राईको समूहबाट मकरबहादुर, उदय सोताङको समूहबाट कुमार र प्रमोद खरेलको समूहबाट नोगेन फाइनलमा प्रवेश गरेका थिए । जहाँ विजेता छिनोफानोको लागि बढीमात्रामा भोटिङ प्रक्रिया आकर्षित थियो ।
सयौं नेपाली संगीत प्रतिभाको ‘करिअर सपना’ र लाखौं संगीतप्रेमी नेपालीले नजर गरिरहेको प्रतियोगिताको विजेता बनेसँगै विनोदलाई इलाम र मोरङबासीबाट बधाई र शुभकामनाको ओइरो लागेको छ । पथरी शनिश्चरेमा पत्रकार सन्तोष राईको संयोजकत्वको विनोद राई जिताऔं अभियान सञ्चालन भएको थियो । उनलाई जिताउन पालिका–पालिकामा विनोदका लागि भोट माग्दै कलाकार र उनका शुभचिन्तक दौडाहामा थिए  । गृहजिल्ला इलामका पूर्वप्रधानमन्त्री खनालदेखि प्रतिनिधिसभा सदस्य बस्नेत, प्रदेशसभा सदस्य रामबहादुर रानामगरलगायत राजनीतिक दलका नेता–कार्यकर्ता, विद्यार्थी, संगीतप्रेमी र सामाजिक अभियन्तालगायतले उनलाई जिताउन भोट दिन आग्रह गरेका थिए । विनोदलाई भोट दिएर जिताउन भन्दै सामाजिक सञ्जालमा प्रचार गरेका थिए । देशविदेशमा अभियान चलेका थिए । त्यस्का अभियन्ता सहित शुभचिन्तकहरुले पनि उसैगरी उनको जितमा खुसी मनाएर बधाई तथा शुभकामना प्रदान गरिरहेका छन् ।
यसैबीच, पूर्वप्रधानमन्त्री झलनाथ खनालले इलामका प्रतिभा विनोदलाई बधाई र शुभकामना दिएका छन् । खनालले सामाजिक सञ्जालमा लेखेका छन्, ‘तपाइँ–हामी सबैको प्रयासबाट सफल हुनुभएकामा विनोद भाइ तपाइँलाई बधाई छ ।’
इलाम क्षेत्र नम्बर १ का प्रतिनिधिसभा सदस्य महेश बस्नेतले पनि विनोदलाई बधाई र शुभकामना दिँदै भनेका छन्, ‘इलामले गायन प्रतिस्पर्धामा एकपटक राष्ट्रिय–अन्तर्राष्ट्रियस्तरसम्मकै ध्यान खिच्न सफल भएको छ, बधाई छ विनोदलाई ।’
जुनसुकै काममा अत्यन्त मेहनती विनोद गायनलाई आफ्नो सबैभन्दा ठूलो रुचि ठान्छन् । यो प्रतिस्पर्धाको ‘ब्लाइन्ड अडिसन’मा चारै ‘कोच’को कुर्सी घुमाएपछि विनोद चर्चामा आएका थिए ।
विनोदको सांगीतिक यात्रा
इलामको फाकफोकथुम गाउँपालिका ५, लुम्देमा बुबा हरिबहादुर र आमा गौमतीको कोखबाट २०४७ कात्तिक १९ मा जन्मिएका विनोदले माध्यमिक तहको शिक्षा गाउँमै लिए । स्थानीय जालपा माध्यमिक विद्यालयबाट कक्षा १० उत्तीर्ण भएपछि ११ र १२ कक्षा पढ्न उनी मोरङको पथरीस्थित पञ्चायत मावि पुगे । त्यहाँबाट कक्षा १२ पास गरेपछि पथरी बहुमुखी क्याम्पसबाट मानविकी संकायको नेपाली विषय र शिक्षा संकायमा पनि स्नातक गरेका छन् ।
सानैदेखि गायनमा रुचि भएका विनोद गाउँघरमा घाँसपात गर्न जाँदा र साथीभाइ भेला हुँदा गीत गाएर सुनाउँथे । उनलाई सबैले गाउने हौसला दिन थालेपछि ‘इलाम आइडल’मा भाग लिए । अरू प्रतिस्पर्धीलाई पछि पार्दै अघि बढेपनि बिरामी परेकाले फाइनलमा सहभागी हुनै पाएनन् । तर, उनको सांगीतिक यात्रा रोकिएन । ‘नेपाली तारा सिजन ३’मा प्रतिष्पर्धा गरे । उत्कृष्ट सातमा पुगेर बाहिरिए । ‘यसबीचमा भएका केही सांगीतिक प्रतिस्पर्धाको नाम लिन चाहन्नँ,’ उनले भने ।
नियमित पढाइसँगै विनोदले पथरीको पूर्वाञ्चल संगीत विद्यालयमा भर्ना भइ संगीतको ‘कखरा’ सुरु गरे । अबोध पन्दाकले उनलाई ‘सरगम’को औपचारिक शिक्षा दिए । झापा दमकस्थित सुरवि संगीत विद्यालयमा अनिल फागोसँग उनले संगीतमा माझिने, थप सिक्ने र आफुलाई निखार्ने मौका पाए । त्यसपछि काठमाडौं गएर ललितकला क्याम्पसमा भर्ना भइ ‘भोकल’मा स्नातक गरे । उनले गीत–संगीतमा स्नातक हासिल गरेको सात वर्ष बितेको छ ।
सामान्य किसान परिवारमा जन्मेका विनोद चार दाजु–भाइमध्येका साहिँला हुन् । उनका तीन दिदी र एक बहिनी छन् । छ वर्षअघि भूटानबाट शरणार्थीका रुपमा झापा बेलडाँगीकी रेनुका राईसँग उनी विवाह बन्धनमा बाँधिएपछि उनको पछिल्लो समयको बसाई रेनुकासँग अमेरिकामा समेत हुने गरेको छ । ‘म भ्वाइस् अफ् नेपाल प्रतिस्पर्धामा जित्नका लागिभन्दा पनि सिक्नका लागि आएको बताउँदै उनले प्रतिष्पर्धामा आफुलाई समाहित गरेका थिए । ‘सुरुमै जितको लक्ष्य राख्ने हो भने आफूमा घमण्ड बढ्छ, त्यसैले यो प्लेटफर्मलाई मैले एउटा पाठशाला र महासागर ठानेर लागिपरें ।’– उनले भने ।