२७ साउन, दमक । दमक क्याम्पसमा अध्ययरत दुई जना विद्यार्थी नरबहादुर बस्नेत र रुपा थापालाई छात्रवृत्ति वापतको तेस्रो वर्षको मासिक शुल्क हस्तान्तरण गरिएको छ । दमक क्याम्पसमा तीन दशक बढी प्राध्यापन तथा क्याम्पस प्रमुखमा रहेर सेवा गरेका चित्रबहादुर बस्नेतको स्वर्गारोहण पछि उनको स्मृतिमा श्रीमती इन्दिरा बस्नेत तथा परिवारले स्थापना गरेको चित्रबहादुर बस्नेत स्मृति अक्षयकोषबाट उक्त शुल्क हस्तान्तरण गरिएको हो । विधानतः दमक क्याम्पसमा बिबिएस अध्ययन गर्ने कम्तिमा दुई जना विद्यार्थीलाई ४ वर्षे कोर्स पूरा गरुञ्जेल लगातार मासिक शुल्क उपलब्ध गराउने प्रावधान रहेको छ । तर विद्यार्थील पढाई छोडे वा फेल भएमा शुल्क रोकिने छ । यस पटक छात्रवृत्ति प्राप्त गर्ने २ विद्यार्थीहरुको तेस्रो वर्षको शुल्क हो र यसअघि पहिलो र दोस्रो वर्षको शुल्क प्राप्त गरेर क्याम्पसमा बुझाई सकिएको छ । सो अवसरमा क्याम्पस प्रमुख यज्ञराज गिरी (राम) व्यवस्थापन समितिका पूर्व अध्यक्षहरु देवी दाहाल, सुरेश सुब्बासहितले अक्षयकोष दाता इन्दिरा बस्नेतलाई खादा ओढाइ सम्मान गरेका थिए ।
