दमक, १३ कार्तिक
अमेरिकामा रहेर पत्रकारिता समेत गर्दै आएका सृजनशील युवा अर्जुन प्रधानले ‘नेपाली मन म्यूजिक शो’ कार्यक्रम सञ्चालन सुरु गरेका छन् ।
भूटानी शरणार्थीका रुपमा दुइ दशक बढी समय झापामा रही अमेरिकामा पुनर्वास गराइएकामध्ये प्रधानले नेपाली मन र नेपाली पनसँग सदैव नजिक रहनका लागि प्रत्येक हप्ताको बुधबार र शनिबार सञ्चालन गरिने कार्यक्रममा भूटानी कलाकारहरुको कथा, ब्यथा, संगीत र साहित्यमा योगदान र सम्मानका विषयमा विशेष चर्चा गर्नेछन् ।
सो कार्यक्रम सोसल मिडिया यूट्यूब, फेसबुक, टिकटक लगायतमा प्रशासरण हुने साथै नेपालको झापाको दमकबाट सञ्चालित सप्तरङगी एफएम १०१.६ मेगाहर्ज मार्फत महिनाको एक साता प्रशारण हुने प्रधानले जनाए ।
प्रधान भूटानी समाजका एक सकृय सञ्चार संयोजकका रुपमा नेपाली सञ्चारक्षेत्र र अन्तर्राष्ट्रीय सञ्चारमाध्यममा निरन्तर काम गर्दै आएका छन् । स्वदेश फर्किने अभियानमा मेची पुलमा पुगेका भूटानी शरणार्थीमाझ रहेको अवस्थामा उनी पनि भारतीय सुरक्षाकर्मीको आक्रमणमा परी घाइते भएका थिए । प्रहरीले लखेटेर कुट्दा उनी मेची पुलबाट तल खसेर दीर्घ रुपमा शरीरमा समस्या आइरहेको समेत सुनाउँछन् । उनले भने ‘हामी भूटानीहरुलाई स्वदेश फर्किन नदिइ पीडा दिएर हाम्रो माटोसँग टाढा बनाइरहेको अवस्थाले मुटु दुखिरहन्छ । हाम्रा यी दुःख पीडाका कथा व्यथाहरु सबैसँग प्रष्ट्याउन समेत यो कार्यक्रमले राम्रै मद्धत पुर्याउने ठानेको छु ।’ उनी साहित्यिक गतिविधि र समाजसेवामा समेत क्रियाशील छन् ।
