उर्लाबारी/ नर्वेको भिसा त्यागेर मोरङ बेलबारीका एक युवक ड्रागन फ्रुट्सको खेतीमा लागेका छन् ।
बेलबारी नगरपालिका–८ का तारा सापकोटा नर्वेको भिसा त्यागेर कृषि पेसामा लागेका हुन् ।
वैदेशिक रोजगारीका लागि उनले १३ लाख रुपैयाँ ठीक पारेका थिए ।
तर, नगरपालिकाले कृषिलाई प्राथमिकता राखेपछि खेतीमा जुटेका उनले ड्रागन फ्रुट्सको खेती सुरु गरेका हुन् ।
ड्रागन फ्रुट्सको खेती गर्ने सापकाटा बेलबारीका पहिला कृषक हुन् ।
सापकोटाले वैदेशिक रोजगारीमा जानका लागि तयार गरेको १३ लाख रुपैयाँ ड्रागन फ्रुट्समा लगानी गरेका छन् ।
बेलबारी नगरपालिकाका नगर प्रमुख ज्ञानेन्द्र सुवेदीले सापकोटाले सुरु गरेको ड्रागन फ्रुट्सका बिरुवा रोपेका थिए ।
ड्रागन फ्रुट्सका बिरुवा रोप्दै मेयर सुवेदीले आफ्नै माटोमा पसिना बगाउन चाहनेलाई सहयोग गर्न नगरपालिका तयार भएको बताए ।
कृषिलाई नै लक्षित गरेर नगरपालिकाले विनाधितो सहुलियत कर्जावापत २ प्रतिशत ब्याजदरमा समूहमा खेती गर्नेलाई ५ लाख ऋण समेत दिने कार्यक्रम अगाडि बढाएको उनले बताए ।
बेलबारीमा रहेका बैकसँग नगरपालिकाले सहकार्य गरेको छ ।