२९ साउन, दमक । मेची बहुउद्धेश्यीय सहकारी संस्थाको २८ औं बार्षिकोत्सव तथा ३० औं साधारणसभाको अवसरमा पत्रकार सम्मेलन गरेर प्रतिवेदन सार्वजनिकसहित वार्षिक गतिविधिबारे जानकारी गराएइको छ । झापाको दमक ६ बाट सञ्चालित सो साकोसले दमकबाट २८ गते सोमबारदेखि सुरु गरेर विभिन्न इलाम, झापा र मोरङबाट सञ्चालित सेवा केन्द्रको साधारणसभा भदौ १२ गते प्रमाणीकरण सभागरी समापन गरिने बताइएको छ । एकता, सहभागिता, मितव्यीता र पारदर्शिता मेची सहकारीको प्रतिबद्धता नारालाई सार्थक तुल्याउँदै समाजका तल्लो वर्गका मानिसको जीवनस्तर माथि उठाउन विभिन्न कार्यक्रमसहित क्रियाशिल रहेको संस्थाले गत आर्थिक वर्षमा गरेका गतिविधि तथा आयआर्जनका मुख्य विषय वा सन्दर्भलाई पत्रकार सम्मेलन मार्फत् जानकारी गराएको थियो ।
दमकस्थित संस्थाको भवनमा सोमबार आयोजित सो कार्यक्रमको अध्यक्षता सञ्चार उपसमितिका संयोजक नरपति पाण्डेले गरेका थिए । उपाध्यक्ष पदम थापाले स्वागत मन्तव्य राखेको सो पत्रकार सम्मेलनमा संस्थाका अध्यक्ष नारायणप्रसाद भट्टराई र कार्यकारी प्रमुख खोम प्रसाद बगालेले सो प्रतिवेदनका बारेमा बोलेका थिए ।
संस्थाले अघिल्ला बर्षहरु जस्तै साउन २८ गते साधारण सभा शुरु हुनु
अगावै संस्थाको सभाहलमा पत्रकार सम्मेलन गरेर सभाका मूल बिषयहरुबारे जानकारी गराएको अध्यक्ष भट्टराईले बताए । सम्मेलनमा साधारण सभा कार्यक्रम र यसबर्ष संस्थाले लिएको नीति, कार्यक्रमहरुबारे जानकारी गराएको हो । कार्यक्रममा संस्थाले साधारणसभामा प्रस्तुत गरिने प्रतिवेदन समेत सार्वजनिक गरिएको थियो । संस्थाका अध्यक्ष भट्टराईले यसबर्ष थप सेवा केन्द्र सुन्दरहरैँचामा विस्तार गर्ने, कमल ७ स्थित इन्द्रेणी बहुउद्धेश्यीय सहकारी संस्थासँग एकीकरण, मेची सहकारी आवास २ सम्बन्धिको परियोजना सञ्चालन लगायतका प्रस्ताव शेयर सदस्यहरु माझ साधारण सभा मार्फत् लगिने जानकारी दिए । संस्थाले सात वटै सेवा केन्द्रहरुमा आगामी भाद्र १२ गते सम्ममा इकाइगत साधारण सभा गरी समापन गर्ने कार्यक्रम रहेको अध्यक्ष भट्टराईले जानकारी दिए । भट्टराईले अन्य सहकारीहरुले कानुनी प्रावधानको उपहाँस गरेर लापरवाही गरेका कारण जोखिममा परेको तर मेची बहुउद्देश्यीयमा त्यस्ता नभएको स्पष्ट पारे । उनले अन्य संस्थाभन्दा मेची साकोस कसरी पृथक छ भन्ने फेहरिस्तासमेत प्रस्तुत गरेका थिए ।
संस्थाको सञ्चार उपसमितिद्धारा आयोजित पत्रकार सम्मेलनमा संस्थाका कार्यकारी प्रमुख खोमप्रसाद बगालेले संस्थाले आर्थिक बर्ष २०८०÷ ०८१ मा कूल ३ अर्ब ८७ करोड, ८६ लाखको वासलात तयार भएको जानकारी दिँदै शेयर पुँजी ३७ करोड १८ लाख, विभिन्न कोषहरुमा ३४ करोड, ८४ लाख रुपैयाँ जम्मा भएको जानकारी दिए । संस्थाका सचिव राजेन्द्र प्रसाद दाहालले सञ्चालन गरेको सो कार्यक्रममा संस्थाका पूर्व अध्यक्ष रोमनाथ ओली लगायतका पदाधिकारी, सदस्यहरु तथा सञ्चालक समितिका सदस्यहरुको उपस्थिति रहेको थियो ।
यसैगरी, सोमबारनै साधारणसभाको पूर्वनिर्धारित कार्यक्रम अनुसार दमक १,२,५,६ ,७ र ८ वडाका सदस्यहरुलाई लक्षित गरि इकाईस्तरको साधारणसभा गरेको थियो । स्थानीय अर्गानिक सव्जीमण्डीको सभाहलमा सम्पन्न सो सभामा संस्थाले तयार पारेको प्रतिवेदन प्रस्तुत गरिनुका साथैं उत्कृष्ठ सदस्यहरुलाई पुरस्कृत गरिएको संस्थाका सचिव दाहालले जानकारी गराए ।
३ करोड बढी कर
संस्थाले विभिन्न कर मार्फत यसवर्ष सरकारलाई ३ करोड २१ लाख ९ हजार ५६२ रुपैया तिरेको छ । संस्थाका प्रमुख कार्यकारी अधिकृत खोमप्रसाद बगालेका अनुसार जिल्ला भित्रका सहकारीहरु मध्ये मेचीले अघिल्ला वर्षझै यसवर्ष पनि धेरै कर बुझाएको हो । जसअनुसार कर्मचारीको पारिश्रमिकक वापत ८ लाख १३ हजार ५ सय ४०, व्याजकर वापत १ करोड ३९ लाख २७ हजार ४८ रुपैया , आयकर वापत १ करोड ८८ लाख ४ हजार ९ सय १४ रुपैया कर बुझाएको उनले जनाएका छन् ।
पत्रकार काफ्ले र अधिकारी पुरस्कृत हुदै
संस्थाले साधारणसभाका अवसरमा बर्षेनी वितरण गरिआएका दुई पत्रकारिता पुरस्कारबाट गोपाल काफ्ले र सुदिप अधिकारीलाई पुरस्कृत गरिने घोषणा गरेका छन् । काफ्लेलाई संस्थाका पूर्व अध्यक्ष गणेशप्रसाद बस्नेतको स्मृतिमा स्थापित गणेशप्रसाद बस्नेत पत्रकारिता पुरस्कार र अधिकारीलाई मेची सहकारी पत्रकारिता पुरस्कार प्रदान गरिने जनाएको हो । उनीहरुसहित गणेशप्रसाद बस्नेत उत्कृष्ठ सहकारी अभियान्ता पुरस्कारबाट यसवर्ष भने नेफ्स्कुनका पूर्व अध्यक्ष ऋषिराज घिमीरेलाई प्रदान गरिने निर्णय भएको अध्यक्ष भटटराईले जनाएका छन् । नगद तथा प्रमाणपत्रसहित वितरण गरिने पुरस्कार संस्थाको प्रमाणीकरण सभाका अवसरमा पुरस्कृत गरिने जनाएका छन् ।
