दमक, १८ चैत। प्रदेश खेलकुद विकास परिषद् वाग्मती प्रदेशले देशव्यापी रूपमा आयोजना गर्ने खुला प्रतियोगिताकालागि दमक–२ स्थित हिमालय माध्यमिक विद्यालयलका दुई जना विद्यार्थी सहभागि हुने भएका छन् ।
आगामी चैत २६ र २७ गते भरतपुर तालिम केन्द्रमा आयोजना हुने प्रथम अन्तर प्रदेश राष्ट्रिय खेलकुद प्रतियोगिता–२०८० का लागि उनीहरूलाई हिमाविका प्रधानाध्यापक, शिक्षक तथा विद्यार्थीहरूले शुभकामनासमेत प्रदान गर्दै विद्यार्थीलाई बिदाई गरेका छन् ।
शुक्रबार विद्यालयमा आयोजित एक कार्यक्रमकाबीच प्रधानाध्यापक द्रोणबहादुर श्रेष्ठले उनीहरूलाई खादा र टीका लगाई बिदाई गरेका थिए । कक्षा १२ व्यवस्थापनको सेक्सन एफ मा अध्ययनरत समीक्षा परियार दुई सय मिटर र चार सय मिटर दौडतर्फ झापा जिल्ला हुँदै कोसी प्रदेशबाट जित निकालेर छनोटमा परेकी हुन् । त्यसैगरी, कक्षा ११ शिक्षा सेक्सन सी मा अध्ययनरत एलिना लिम्बू पनि ज्याबलिङ थ्रोतर्फ जिल्ला, प्रदेश हुँदै छनोटमा परेकी हुन् । आयोजनाअघि उनीहरूलाई प्रदेश खेलकुद विकास बोर्ड कोसी प्रदेश विराटनगरले इटहरी रङ्गशालामा यही १७ चैतदेखि २४ गतेसम्म थप प्रशिक्षण दिने प्रशिक्षक सुमन भण्डारीले जानकारी दिए ।
