समाचार

बेलायतका प्रधानमन्त्री बोरिस जोन्सन अस्पताल भर्ना

बीबीसी । बेलायतका प्रधानमन्त्री बोरिस जोनसन कोरोना भाइरसको सङ्क्रमण देखिएको १० दिनपछि अस्पताल भर्ना भएको डाउनिङ स्ट्रिटले जनाएको छ । आइतवार साँझ उनलाई लक्षणहरू उस्तै देखिएको र तापक्रम पनि रहेकाले लन्डन अस्पतालमा भर्ना गरिएको हो । उनका डाक्टरको सुझावपछि यो कदम सावधानीको रुपमा चालिएको बताइएको छ ।

सरकारको जिम्मेवारी प्रधानमन्त्रीले नै सम्हालिरहेका छन्, तर सोमबार बिहान हुने कोरोनाभाइरससम्बन्धी बैठकको अध्यक्षता भने विदेशमन्त्रीले गर्ने ठानिएको छ ।

उपचारका लागि अस्पताल पुगेका जोनसन रातभरि अस्पताल नै बस्ने ठानिएको छ ।
बीबीसीकी राजनीतिक सम्पादक लोरा कुन्सबर्गका अनुसार प्रधानमन्त्री अस्पतालमा हुने परीक्षणलाई नियमित परीक्षणका रूपमा व्याख्या गरिएको छ ।

डाउनिङ स्ट्रिटले निकालेको विज्ञप्तिमा भनिएको छ– ‘चिकित्सकको सल्लाहमा प्रधानमन्त्री आज राति परीक्षणका लागि अस्पताल भर्ना हुनुभएको छ ।’

‘कोरोनाभाइरसको सङ्क्रमण देखिएको १० दिन बितिसक्दा पनि प्रधानमन्त्रीलाई लक्षणहरू निरन्तर उस्तै देखिएकोले यो कदम सावधानीका रुपमा चालिएको हो ।’

प्रधानमन्त्री कार्यालयकी प्रवक्ताले थपि, ‘प्रधानमन्त्रीले राष्ट्रिय स्वास्थ्य सेवा एनएचएसका सबै कर्मचारीहरूलाई उनीहरूको कडा परिश्रमका लागि धन्यवाद दिएका छन् र सर्वसाधारणलाई घरभित्रै सुरक्षित बस्न सरकारले दिएको सुझाव मान्न पनि भनेका छन् ।’

You may also like