प्रमुख सत्तारुढ नेपाल कम्युनिष्ट पार्टी (एमाले) को आठौं केन्द्रीय समिति बैठक दोस्रो दिन ललितपुरको च्यासलस्थित कार्यालयमा सुरु भएको छ ।
१० महिनापछि बसेको बैठकको दोस्रो दिन सोमबार पार्टी अध्यक्ष एवम् प्रधानमन्त्री केपी शर्मा ओलीले हिजो प्रस्तुत गरेको राजनीतिक प्रतिवेदनमाथि छलफल हुँदैछ ।
दस्तावेजहरूमाथि यसअघि गरिने सामूहिक छलफलको परम्परा तोड्दै एमालेले यस पटक नयाँ अभ्यास गरेको छ । उसले यस पटक ओलीले बैठकमा प्रस्तुत गरेको ४७ पृष्ठ लामो प्रतिवेदनबारे र अन्य विषयमा हरेक केन्द्रीय सदस्यलाई बोल्न तीन मिनेट समय दिएको छ ।
यस पटक ओलीको राजनीतिक प्रतिवेदन र अर्को सांगठानिक प्रतिवेदनमा सबै केन्द्रीय सदस्यलाई बोल्न दिइएको हो । प्रतिवेदनसहित समसामयिक विषयमा केन्द्रीय सदस्यलाई बोल्न तीन मिनेटको समय दिइएको उपाध्यक्ष सुरेन्द्र पाण्डेले बताए ।
ओलीको राजनीतिक प्रतिवेदनमा आगामी कार्ययोजना, पार्टी सङ्गठन सुदृढीकरण, वर्तमान सरकार गठन, यसअघिका सरकारमा साझेदारी, सरकारका प्राथमिकता, संविधान संशोधन, आर्थिक सुधार, सहकारीलगायत विषय समेटिएका छन् ।
एमालेको बैठकमा तीन सय ५७ केन्द्रीय सदस्य, सात प्रदेशका अध्यक्ष र चारवटा केन्द्रीय आयोगका प्रमुख सहभागी रहेका छन् । बैठक सकेसम्म सोमबार नै सक्ने तयारी छ । यदि नसकिएमा मंगलबार टुंग्याउने गरी एमालेले छलफल अघि बढाएको छ ।
एमाले केन्द्रीय कमिटी बैठक २०८० फागुनमा बसेयता बस्न सकेको थिएन । २०८१ असार ३० गते ओली प्रधानमन्त्री बनेयता यो पहिलो केन्द्रीय कमिटी बैठक हो ।
ओलीले सरकार बनेयताको अवधि र नेपाली कांग्रेससँगको सत्ता सहकार्यबारे पनि समीक्षात्मक प्रतिवेदन पेश गरिसकेका छन् ।
ओलीको प्रतिवेदनमा गठबन्धन सरकार, सरकार बनेयताको ६ महिने उपलब्धि र आगामी दिनका कामबारे उल्लेख गरिएको छ ।
