मुख्य

दमक–चिसापानी सडक निर्माणकार्यले द्रुत गति लिन सकेन,आधाभन्दा बढी काम अधुरै

विमल लामिछाने
दमक, १५ पुस। झापाको दमकदेखि इलामको माङसेबुङ हुँदै पाँचथरको मिक्लाजुङ जोड्ने दमक–चिसापानी–रवि सडक (फाल्गुनन्द मार्ग) को निर्माण कार्यले गति लिन सकेको छैन । आधाभन्दा बढी काम अधुरो अवस्थामा छ ।
निर्माण कार्यले गति लिन नसकेको गुनासो आउनका साथै समितिको बैधानिकता समेत समाप्त भइसकेको टिप्पणी हुन थालेको बेला निर्माण समितिले अन्तिम चरणको काम शुरु भएको बताएको छ । सो सडकको परिकल्पना भएको करिब ३५ वर्ष वितिसकेपनि निर्माण कार्य सम्पन्न हुनेमा अझै अन्योल सृजना हुँदा जनस्तरबाटै प्रश्न उठ्न थालेको छ । लामो समय यो सरकारको प्राथमिकतामा परेन । जब प्राथमिकतामा पर्यो र बजेट पर्याप्त आयो त्यसपछि काम भएन । पछिल्लो समयमा पूर्ण बजेट सहित दमकदेखि चिसापानी सडक निर्माणको लागि ठेक्का लाग्यो तर अहिलेसम्म ५० प्रतिशत काम भएको छैन ।
दमकदेखि चिसापानीसम्मको ३५ किलोमिटर कालोपत्रेका लागि लागेको ठेक्काको समय बारम्बार थपिँदासमेत काम पूर्ण भएको छैन । सडक कालोपत्रेका लागि तीन खण्डमा काम गर्ने गरी निर्माण सम्झौता भएको थियो ।
माथिल्लो दुईखण्ड निर्माणको जिम्मा लिएको लुम्बिनी–गणपति जेभीले एक वर्षभित्र सम्पन्न गर्ने प्रतिबद्धता जनाएको छ । कालोपत्रका लागि लागेको ठेक्काको समय चार पटकसम्म थप हुँदा समेत निर्माण हुन सकेको छैन । पहिलो खण्ड मानिएको दमकदेखि साढे छ किलोमिटर महालक्ष्मी–किराँतेश्वर जेभीले ३० महिनाभित्र सक्नेगरी विसं २०७५ साउन अन्तिममा सम्झौता गरेको थियो । दोस्रो खण्ड १५ किलोमिटर र तेस्रो खण्डको ११ किमी सडक निर्माणको ठेक्का लुम्बिनी–गणपति जेभीले पाएको छ । सो सडकखण्ड ५४ करोड ४४ लाख ८७ हजार र तेस्रो खण्ड ५९ करोड १५ लाख ३५ हजारमा ठेक्का लागेको थियो । सडकमा धेरैजसो ठाउँमा नाली निर्माण र ग्याभिङ वालको काम भने सम्पन्न भइसकेको छ ।
समितिका अध्यक्ष रेवतराज पुरीले आफू अध्यक्ष भएर आएयता २० ओटा कल्भर्ट, ४ वटा पुल, ट्रयाक वेभ र सव वेभ, बेष्ट वाल (भित्तातर्फ लगाइने), रिटेनिङ वाल लगायतका काम सम्पन्न गरेको जानकारी दिए । उनले झापा खण्डतर्फ ३ किलोमिटर र इलामतर्फ ३ किलोमिटर सडक कालोपत्रे भइसकेको र सडक डिभिजन कार्यालय तथा निर्माण समितिबीच भएको पछिल्लो प्रतिबद्धता अनुसार बहुवर्षे योजना भएकाले दमक – चिसापानी सम्मको ३५ किलोमिटर लामो र ८ मीटर चौडाइको सडक यही आर्थिकवर्षभित्र पूर्ण हुनेगरी अबको कालोपत्रेको काम यही माघ पहिलोसाताबाट शुरु गरिने बताए । पुस मसान्तमा कामसक्ने गरी ठेक्का लगाइएको
आधाभन्दा बढी…..सडकको पुनःएक वर्ष म्याद थप गर्ने सहमति भएको छ । कालोपत्रका लागि ठेक्का लागेर पनि अलपत्र बनेको सो सडक अब एक वर्षभित्र सम्पन्न गर्ने गरी निर्माण कम्पनी र सरोकारवाला निकायबीच सहमति भएको सडक डिभिजन कार्यालय दमकका इञ्जिनियर सुधीरकुमार झाले बताए ।
तीन खण्डमा रहेको सो सडकको विभिन्न चरणमा म्याद थप गर्दै निर्माण अगाडि बढाइएको थियो । पहिलो खण्ड आगामी वैशाखसम्ममा काम सक्ने ठेकेदार कम्पनीले प्रतिबद्धता जनाएको छ । बाँकी दुई खण्ड एक वर्षभित्रमा काम सम्पन्न गर्ने सहमति भएको पनि झाले बताए ।
सडक निर्माणमा आइलाग्ने समस्याका कारण र समयमा रकम भुक्तानी नहुँदा काममा ढिलाई भएको निर्माण कम्पनीका सञ्चालक तुलसीराम भण्डारीले बताए । उनले भर्खरै स्थानीय राजनीतिक दल तथा सरोकारवाला निकायले बाटो खोलिदिने सहमति भएसँगै काम अगाडि बढाइने सहमति भएकोले काम अब द्रुत गतिमा हुने बताए । आर्थिक वर्षमा भुक्तानी हुनुपर्ने रकम भुक्तानी नभएकाले काम गर्न समस्या भएको उनको गुनासो छ । भुक्तानी समयमा भए अब वैशाखसम्ममा जसरी पनि काम सम्पन्न गर्ने उनको भनाई छ ।

You may also like