दमक/ एम्नेष्टी इन्टरनेसनल नेपाल समूह–७५ दमकको १४औँ वार्षिक साधारण सभा शनिबार दमक–५ स्थित ज्येष्ठ नागरिक सम्मान प्रतिष्ठान नेपाल केन्द्रीय कार्यालयमा सम्पन्न भएको छ । समूह संयोजक प्रेमबहादुर बस्नेतको अध्यक्षतामा आयोजित कार्यक्रममा एम्नेष्टी इन्टरनेसनल नेपालका पूर्व केन्द्रीय सदस्य शेषकुमार निरौला प्रमुख अतिथि रहेका थिए । विशिष्ट अतिथिका रूपमा ब्रह्माकुमारी राजयोग सेवा केन्द्र दमककी प्रमुख सञ्चालिका राधा दिदी सहभागी भएकी थिइन् ।
कार्यक्रममा वर्तमान संयोजक हरिप्रसाद नेपाल, ज्येष्ठ नागरिक सम्मान प्रतिष्ठान नेपालका उपाध्यक्ष शिवप्रसाद काफ्लेलगायतको उपस्थिति रहेको थियो । सचिव पदमप्रसाद रेग्मीले सञ्चालन गरेको कार्यक्रमको उद्घाटन प्रमुख अतिथिले पानसमा दीप प्रज्वलन तथा ब्यानर वाचन गरेर गरेका थिए ।
सह–संयोजक ठाकुरहरि पोखरेलले स्वागत मन्तव्य व्यक्त गरेका थिए भने अनुगिरि र शुरवीर श्रेष्ठले स्वागत गान प्रस्तुत गरेका थिए । सभामा अध्यक्ष प्रेमबहादुर बस्नेतले संस्थागत प्रतिवेदन तथा कोषाध्यक्ष शुरवीर श्रेष्ठले आर्थिक प्रतिवेदन प्रस्तुत गरेका थिए ।
कार्यक्रममा चारु बस्नेत, प्रतिक्षा कार्की, रिया आचार्य र उपासना उप्रेतीले सांस्कृतिक नृत्य प्रस्तुत गरेका थिए । साथै, ब्रह्माकुमारी राजयोग सेवा केन्द्रकी प्रमुख सञ्चालिका राधा दिदी, समूह–६० की संयोजक नम्रता निरौला वराल तथा पूर्व कार्यसमिति सदस्य छविरमण निरौलाले शुभकामना मन्तव्य व्यक्त गरेका थिए ।
