मुख्य

मानव अधिकार सुदृढिकरणमा जोड

दमक, २६ पुस। स्थानीय तहमा मानव अधिकारको अवस्थालाई कसरी बलियो बनाउने भनेर पूर्वतयारीका रुपमा राष्ट्रिय मानव अधिकार आयोगले झापाको दमक नगरपालिकाका जनप्रतिनिधिहरु लगायत अन्य सरोकारवालाहरु संग अन्तरक्रिया गरेको छ । आयोगले बुधबारदेखि कार्याशालाका रुपमा शुरु गरेको सो अन्तरक्रियामा भौतिक, सामाजिक, आर्थिक तथा मानवको चौतर्फी विकासमा मानव अधिकारका सवाललाई कसरी सुदृढ र व्यवस्थित गराउन सकिन्छ भनेर जनप्रतिनिधिहरुको धारणा लिनुका साथै आयोगका परामर्शदाताहरुले आफ्ना तर्फबाट विषयगत प्रस्तुति गरेका थिए ।
आयोगका सदस्य डा. सूर्य ढुंगेलको अध्यक्षतामा भएको कार्यक्रममा व्यक्त विचार र धारणा तथा अन्तरक्रियाबाट निस्केका निष्कर्षहरुलाई समेटेर स्थानीय तहमा मानव अधिकारका कार्य गर्न सजिलो हुनेगरी स्रोत पुस्तिका तयार गरिने जानकारी गराए । उनले अहिलेको परिस्थितिमा तीन तहका सरकारहरु मध्ये सबैभन्दा बलियो स्थानीय तहको सरकार भएकाले आधारभूत रुपमा मानव अधिकार कार्यान्वयनको सवाल पनि सबैभन्दा बढी प्रभावकारी ढंगले त्यहीँबाट व्यवहारमा ल्याउनुपर्ने बताए । आयोगको कोशी प्रदेश कार्यालयका प्रमुख पवन कुमार भट्टले मानव अधिकारको संरक्षण, संवद्र्धन र परिपूर्ति गर्ने दायित्य स्थानीय सरकारको पनि भएकाले आम नागरिकलाई मानव अधिकारको उपभोग गर्ने सहजताका लागि अब बनाइने स्रोत पुस्तिकाले महत्वपूर्ण भूमिका खेल्न सकोस् भन्नेगरी तयार गर्नुपर्ने प्रष्ट पारे ।
कार्यक्रमका विशेष अतिथि दमक नगरपालिका प्रमुख राम कुमार थापाले मानव अधिकारको सवाल मानिसको वैयक्तिक स्वतन्त्रता र लोकतन्त्रको सुन्दर पक्ष भएको तर त्यसलाई के कसरी उपभोग गर्न सकिन्छ र स्थानीय तहले के के गर्नुपर्ने हो भन्ने बारेमा जानकारी दिनु सान्दर्भिक हुने बताए । नगर प्रमुख थापाले मानव अधिकारको विश्वव्यापी घोषणा पत्र र संविधान प्रदत्त अधिकारहरुको उपभोगका लागि प्रभावकारी कार्यान्वयन र अनुगमनको पाटोलाई सशक्त बनाउन नगरपालिका पनि आवश्यक भूमिका निर्वाह गर्न तयार रहेको कुरा राखे । आयोगका परामर्शदाता तथा इन्सेक नेपालका अध्यक्ष डा. कुन्दन अर्याल र मानव अधिकार अभियन्ता मधु दवाडीले मानव अधिकारको अवधारणा, तिनको व्यवहारिक कार्यान्वयन तथा स्थानीय तहमा भएगरेका कार्यहरुका बारेमा आफ्नो प्रस्तुति गरेका थिए । कार्यक्रममा दमक नगर उप–प्रमुख रेगिना भट्टराई प्रसाई, वरिष्ठ प्रशासकीय अधिकृत यज्ञराज निरौला, प्रायः सबै वडाका वडाध्यक्षहरु, नगरपालिकाका अधिकृतहरु, सामुदायिक विद्यालयका प्रधानाध्यापक तथा संचारकर्मीहरुको सहभागिता रहेको थियो ।
कार्यक्रममा दमक–४ का वडाध्यक्ष पुण्य प्रसाद दाहालले विकास र मानव अधिकारको सन्दर्भमा कुरा उठ्दा ग्रामीण क्षेत्रका जनताले भौतिक र पूर्वाधार विकासमा बढी जोड दिने गरेको तर शहरका जनताले भने शिक्षा र स्वास्थ्य जस्ताका सामाजिक विकासका कुरामा बढी ध्यान दिने गरेको अनुभव सुनाएका थिए । वडा नं ३ का वडाध्यक्ष नविन बरालले भने शिक्षा र स्वास्थ्यमा भनेजति बजेट संघीय सरकारबाट नआउँदा काम गर्न केही समस्या भएको बताए । सो कार्याशाला आज बिहीबार पनि संचालन भइ समापन हुने कार्यसूचि रहेको छ । यस्ता कार्याशालाहरु देशका सातवटै प्रदेशमा आयोजना गरिने र दमकको कार्याशाला कोशी प्रदेशका लागि भएको यस प्रकारको देशकै पहिलो कार्याशाला रहेको जानकारी गराइएको छ ।

You may also like